БИШКЕК, 25-окт. — Sputnik. Ысык-Көл облусуна караштуу Чок-Тал айылында айдоочу сүзүп кеткен үч адам мүрт кетти. Бул тууралуу Sputnik Кыргызстан агенттигине аймактык ИИБден билдиришти.
Кырсык шейшемби күнү, 24-октябрда саат 20.30дар чамасында Балыкчы — Ананьево — Каракол унаа жолунун 55-чакырымында болгон.
"Бишкек шаарынын 32 жаштагы тургуну Toyota Land Cruiser Prado үлгүсүндөгү унаасы менен баратып жолдон өтүп бараткан үч адамды сүзүп кеткен. 37 жана 32 жаштагы эки аял жана алардын биринин колундагы эки жаштагы кыз дөңгөлөк алдында калган. Үчөө тең мүрт кеткен", — деп ИИБден билдиришти.
Медициналык экспертизанын жыйынтыгы айдоочу соо болгонун көрсөткөн. Факты боюнча кылмыш иши козголуп, айдоочу убактылуу кармоочу жайга киргизилди.
