БИШКЕК, 7-окт. — Sputnik. Ноокат районунун Көк-Жар айыл өкмөтүнүн Жийде айылында эки унаа кагышып, кырсыктын кесепетинен жети адам ооруканага түштү. Бул тууралуу облустук Кайгуул милициясынын маалымат катчысы Айбек Бечелов Sputnik Кыргызстан агенттигине билдирди.
Анын айтымында, окуя 6-октябрь күнү саат 15:00дөр чамасында Ош—Исфана унаа жолунун 59-чакырымында катталган.
"Honda Fit үлгүсүндөгү унаанын 21 жаштагы айдоочусу Ошту көздөй келе жатып, Исфана багыты боюнча бараткан "ВАЗ" үлгүсүндөгү унаа менен кагышкан. Кырсыктын кесепетинен Honda Fit үлгүсүндөгү унаанын айдоочусу менен кошо эки жүргүнчү аял Ноокат райондук ооруканасынын сыныктар бөлүмүнө кайрылып, дагы эки жүргүнчүсү жандандыруу бөлүмүнө жаткырылган. Экинчи унаадагы айдоочу менен жүргүнчү да жергиликтүү ооруканага түшкөн", — деди Бечелов.
Ал бул фактынын негизинде териштирүү башталып, жол эрежесин одоно бузган айдоочуну аныктоо иштери жүргүзүлүп жаткандыгын кошумчалады.
