БИШКЕК, 19-сен. — Sputnik. Индонезиянын полициясы өлкө президенти Жоко Видодого кол салууну пландаган согушкерди курал-жарагы менен кармады. Бул тууралуу РИА Новости агенттиги Strait Times басылмасына таянуу менен жазып чыкты.
Маалыматка ылайык, 31 жаштагы шектүү кишини Чиребон шаарындагы Penggung аэропортунан кармашкан. Дал ушул шаарга президент маданий фестивалга катышуу үчүн келген болчу.
Алдын ала алынган ыкчам маалыматтарга ылайык, шектүү жаран жергиликтүү Жемаа Аншарут Даула террордук тобунун мүчөсү болгон. Алардын "Ислам мамлекети" террордук тобу менен байланышы бар экенин аталган басылма баса белгилеген.
Провинция полициясынын берген маалыматына ылайык, кармалган кишинин жанынан курал-жарак жана радикалдык чакыруулар басылган баракчалар табылган.
