БИШКЕК, 29-авг. — Sputnik. Жайыл районунда террорчулукка каршы атайын операция өткөнүн Улуттук коопсуздук мамлекеттик кызматынын маалымат кызматы билдирди.
Азырынча толук маалымат жок, айрым ЖМКлар анын жүрүшүндө эки кылмышкер жок кылынганын жазышууда.
Атайын кызмат окуянын чоо-жайы тууралуу кийинчерээк маалымат берилерин айтты.
Эскерте кетсек, 24-августтун түнүндө Кайгуул милициясы документтерди текшерүү үчүн Ауэзов көчөсүнөн мамлекеттик номери S 8191 AG болгон Nissan Presage үлгүсүндөгү машинаны токтоткон. Анын ичинде төрт киши отурган. Жүргүнчүнүн бири тапанча алып чыгып, милиция кызматкеринин башына такаса, экинчиси граната алып чыгып "жардырам" деп коркуткан. Мындан улам укук коргоо органдарынын өкүлдөрү аларды коё берүүгө аргасыз болуп, кылмышкерлер из жашырып кетишкен.
Кийин "Перехват" планы жарыяланып, шектүүлөр издөөгө алынган. Машина Көк-Жар конушундагы Кулмырзаев көчөсүнөн табылып, анын ичинен китептер жана уюлдук телефон алынган.
