БАЛЫКЧЫ, 25-авг. — Sputnik. Балыкчы шаарынын үй-бүлөлүк дарыгерлер борборунда кезекте тургандар өтө көп. Бул тууралуу аймактык кабарчы билдирди.
Анын айтымында, дарыгерге балдарын көрсөтүү үчүн келгендер имараттын ичине батпай, ысыктан балдары ыйлап, кезек күтүп жаткан ата-энелер кер-мур айтыша кетип жатышат.
Балыкчы шаарынын 67 жаштагы тургуну Калима Ишенакунова эртең менен саат 7:00дө келгендер дагы кийинки күнгө калып жатканын айтты.
Кезек күтүп турган Роза Алиева аттуу жаран дагы ооруканага таңкы саат 5:30да келгенин билдирди.
"Кечээ да келгем, дагы эле кезегим жетпей күтүп отурам. Мунун бир себеби, адистердин жетишсиздиги деп ойлойм", — деди ал.
Ал эми үй-бүлөлүк дарыгерлер борборунун жетекчиси Дамира Мусабаева адистердин жетишсиздиги негизги көйгөй экенин ырастады.
"Азыркы учурда бизде 25 адис жетишпейт. Окуусун бүткөн жаш кадрлар элет жерине келе бербейт, себеби маянасы болгону 5000 сомду түзөт. Келсе дагы жатаканалары жок. Ал эми батирге 3000 сом төлөш керек болот. Калган 2000 сомду жеткирүү мүмкүн эместигин баарыңыздар эле билесиздер. Мындай көрүнүш Балыкчы шаарында гана эмес республиканын бардык аймактарында кездешет", — деди ал.
Андан сырткары, жаңы окуу жылы башталып, балдарын мектепке, бала бакчага даярдаган кызматкерлер айдын аягында келгендиктен адистер жетишпей жатканын кошумчалады
"Негизи июнь айынан баштап даярдык көрө башташса да мындай ыңгайсыз көрүнүштөр болбойт эле", — деди Мусабаева.
Жетекчи андан сырткары көз, мурун, кулак, ооз дарылай турган дарыгерлер жаз, күз мезгилдеринде аскердик комиссариатка аскерге чакырылган балдарды кароо үчүн жумасына 2-3 жолу барышарын айтты.
