БИШКЕК, 23-авг. — Sputnik. Нарын шаарынын күнү 16-сентябрда белгиленип, ал республикалык деңгээлдеги бир катар маданий иш-чаралар менен коштолот. Бул туурасында аталган калаанын мэриясынын маалымат кызматынан кабаралашты.
Быйыл тоо койнундагы калаа 149 жылдыгын өткөрөт.
Нарын шаарынын күнүнө карата шаардын бардык аймактарында майрамдык иш-чаралар болот.
"Бул күнү сейил бактарда улуттук каада-салттарды чагылдыруу боюнча сынак, тамак-аштардын, кол өнөрчүлүктүн көргөзмөлөрү, боз үйлөрдүн сынагы уюштурулат. Кыргыздын маданиятын чагылдырган "Нукура фест" маданий иш-чарасы өтөт", — деп билдиришти аталган шаардын мэриясынан.
Андан сырткары, майрамдын катышуучулары улуттук музыкалык аспаптардын жана "Тоо койнундагы шаар" аталыштагы сүрөт көргөзмөсүндө күбө боло алат.
