БИШКЕК, 22-авг. — Sputnik. Талас шаарында чек ара кызматкерлерине салынып жаткан көп кабаттуу үй сапатсыз кыш менен курулуп жатканы аныкталды. Бул тууралуу Экология жана техникалык коопсуздук боюнча мамлекеттик инспекциясы билдирди.
Ага ылайык, текшерүүнүн натыйжасы менен курулуш Мамэкотехинспекция тарабынан буздурулуп, кайрадан сапаттуу курулуш материалдарын пайдалануу талабы коюлган.
"Курулушка жараксыз кыш колдонулган. Атайын лабораториядан өткөргөндө кыштын сапатсыз экени далилденген. Инспекторлор тарабынан мыйзамсыз иштер жеринде токтотулуп, акт, протоколдор толтурулду. Учурда колдонулган сапатсыз материалдар апайдалануудан алынып, сапаттуу, сертификаты бар куруу каражаттары менен курулуш уланууда", — деп айтылат маалыматта.
Куруучу компанияга административдик айып салынган.
Мамэкотехинспеция сапатсыз курулуш материалдарын көп кабаттуу курулуштарга колдонбоо керектигин эскертет.
