БИШКЕК, 22-авг. — Sputnik. Ош облусунун Араван районунда табигый жана техногендик мүнөздөгү өзгөчө кырдаалдардын болуусун эске алуу менен жарандык коргонуунун бөлүктөрү атайын машыгуудан өттү. Бул тууралуу ӨКМдин маалымат кызматы билдирди.
Ош облустук башкаруу пункту аркылуу облустук жана Араван райондук жарандык коргонуу кызматтарына машыгуу башталышы боюнча "Шоола-110" сигналы берилди.
Машыгуунун жүрүшүндө райондук жарандык коргонуу кызматтарына жана жергиликтүү өзүн-өзү башкаруу органдарына тапшырмалар берилген.
Машыгуунун максаты — жарандык коргонуу жаатындагы ченемдик-укуктук актылардын аткарылышын көзөмөлдөө. Андан сырткары, өзгөчө кырдаалдар пайда болгондо күч каражаттардын эсебин жана өзгөчө кырдаалдарда ар тараптуу иш-чаралардын аткарылышын баалоо болуп саналат. Ошондой эле жапа чеккен калкты учурунда ар тараптуу камсыздоого да басым жасалган.
