Жайкы эс алууда кичи мекеним Аксыга барып, бир апта туруп келдим. Ким менен кезикпейин, саясаттан кеп уруп, ажону сындап, кошуна өлкөнүн президенттерин мактап жаттык. Анан сөз нугу шайлоого барып такалып, "бул "сезондо" жол курдуруп, көпүрө салдырып алалы, болбосо куйругун карматпай кетишет" дешти. Дагы бирөөсү жарык койдуралы десе, башкасы суу чыгарталы дейт. Кыскасы бир келген мүмкүнчүлүктү колдон чыгарбай, мүмкүн болушунча саан уйлардын сүтүн саап алалы дешүүдө. Мурункудай "тигинин тамагын жедим эле, ошого добушумду беришим керек" дегендер жок. Бергенин эч уялбай алып, урнага барганда каалаганыбызга салабыз дешүүдө. Андыктан ажолукка аттангандар быйыл кыйла эле каражатын коротуп, көп адамдарды "ишке алышы" керек болот.
Мурункудай акча таркатуу менен гана чектелбей, балким Ош мэрине окшоп жаштар менен кошо ырдашы керек болоттур.
Ага да көнбөсө "Нукура фест" сыяктуу иш-чараларды уюштуруп, "Ала-Тоо таңшыйтка" окшогон фестивалдарды өткөрүшү керек.
Эмнеси болсо да элдин элегинен өткөн соң, татыктуу президент болсо болгону. Чек араны бекемдеп, жол кырсыктарын азайтса, анан эстакадалык көпүрөлөрдү куруп, жарыкты убагында берип турса эле болду. Эгерде жакшылап иштей турган болсо эл аны алаканга салып алаары бышык.
Бүгүн өлкө аймагында жамгыр себелейт.
Валюта наркы. Сомдун баасы долларга карата орто эсеп менен 68.75 (сатып алуу) жана 68.90 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгүсү 37.70 сом, АИ-95 үлгүсүндөгүсү 40.50 сом, ал эми дизель майы 35.50 сомдон сатылууда.
Соңку сөз. Бийлик колдон учса да эл эмгектен эскерсин.
Амандыгыңызды тилеп, Исмаил Мамытов.
