БИШКЕК, 1-авг. — Sputnik. Балыкчы шаарындагы Жөө аскерлердин аскер бөлүгүндө КМШ өлкөлөрүнүн армияларынын ортосунда өткөн аскердик-спорттук оюндардын жыйынтыгында Кыргызстан менен Россиянын жоокерлери биринчи орунга чыгып, алтын медаль тагынышты. Бул тууралуу Куралдуу күчтөрдүн Генералдык штабынан маалымдашты.
Билдирмеге караганда, таймаш бүгүн, 1-августта аяктаган.
"Генералдык штабдын "Эдельвейс" окуу борборунун базасында Кыргызстан, Армения, Белоруссия, Казакстан, Россия жана Тажикстандын 300дөн ашык аскер кызматкери уруш, оордук көтөрүү, аскердик кармаш, штаттык жана табелдик куралдан атуу, жеке жана командалык эсепте офицердик үчтүк күрѳш жана командирдик старт боюнча күч сынашты", — деп айтылат маалыматта.
Оюндун жалпы эсебинде кыргызстандык аскер кызматкерлери Россиянын армиясы менен биргеликте биринчи орунду камсыз кылышкан. Экинчи орунду Казакстандын, үчүнчүнү Белоруссиянын жоокерлери ээлеген.
