Ош — Баткен — Исфана автожолуна асфальт төшөө уланууда

ОШ, 25-июл. — Sputnik. Ош — Баткен — Исфана жолунун 238-252-чакырымына асфальт төшөө иштери уланууда. Бул аралыктар аталган жолдун акыркы бөлүгү болуп саналат.

Ош — Баткен — Исфана жолу 402 чакырымды түзүп, курулуш иши 2013-жылы июлда башталган. План боюнча ал 2018-жылы бүткөрүлөт.

Баткен шаарынан Төрт-Күл участкасына чейинки 20 чакырым аралык үстүбүздөгү жылдын күз айларында аяктайт. Ал эми Лейлек районундагы 32 чакырымды түзгөн жолду бүткөрүү 2018-жылга пландалган. Асфальт төшөө иштери аяктаса Баткен шаары менен Лейлек районун байланыштырган 50 чакырым жол оңдолот.

Жол инженери Икрам Акматовдун айтымында, курулуш жолдун бардык аймактарында жүруп жатат.

"Бул жол Ош — Баткен — Исфана жолун оңдоо долбоорунун акыркы этабынын алкагында реконструкцияланып жатат. Курулуш үчүн Дүйнөлүк банк 430 миллион сом бөлүп, азыр 30 пайыздык жумуш аткарылды. Асфальт эки катмар басылып, калыңдыгы 10 сантиметрди түзөт. Ал эми оңдолчу жолдун жалпы узундугу 50 чакырым болуп, туурасы 10 метрге жетет", — деди Акматов.

Дүйнөлүк банктын эсебинен реконструкцияланган курулуштун сапаты эл аралык компания өкүлдөрү тарабынан тыкыр көзөмөлгө алынган.

Курулушту тендерден утуп чыккан Кытайдын Цизянь-Цинь компаниясы жүргүзүүдө.