БИШКЕК, 20-июл. — Sputnik. Ош облусунун Өзгөн районундагы Бабур айылында ойноп жүргөн кыз Базар-Арык суусуна түшүп, агып кеткен. Бул тууралуу ӨКМ билдирди.
Маалыматка ылайык, кызды издөөгө төрт куткаруучу тартылып, беш сааттан кийин сөөгүн табышкан.
Ал эми Чүй облусунун Сокулук районундагы Төш-Булак айылында 10 жашар кыз Сокулук суусуна агып кеткен. Учурда аны издөө иштери улантылууда.
Бишкек шаарында болсо Комсомол көлмөсүнө түшүп жатып чөгүп кете жаздаган 29 жаштагы аялды куткаруучулар сактап калышкан. Ага алгачкы жардам көрсөтүлүп, андан соң дарыгерлерге өткөрүп берилген.