БИШКЕК, 12-июл. — Sputnik. Ысык-Көл облусунун Тоң айылында 15-июль күнү "Тескей жээк" этнофестивалы өтөрүн Маданият, маалымат жана туризм министрлигинин маалымат кызматынан билдиришти.
Фестивалдын программасында тыйын эңмей, кыз куумай, көк бөрү, жаа атуучулар мелдеши жана Салбурундун элементтери көрсөтүлмөкчү.
Ошондой эле кол өнөрчүлөрдүн эмгектеринин көргөзмөсү уюштурулат.
"Маданий жана спорттук программаларга Ысык-Көлдүн түштүк жээгиндеги оюнчулардан жана Дүйнөлүк көчмөндөр оюндарынын лауреаттарынан турган этно спорттун кесипкөй командалары катышат. Фестивалдын коноктору боз үй тигүүгө катышып, көчмөн элдин каада-салты менен тааныша алат", — деди Туризм департаментинин директору Азамат Жаманкулов.
Фестиваль "Кара-Жорго" бий флеш-мобу менен аяктайт.
