БИШКЕК, 7-июл. — Sputnik. Facebook тармагынын колдонуучусу Мидин Сактанов өздүк баракчасына Ысык-Көлдүн айланасында чар-жайыт ыргытылган таштандылардын сүрөтүн жарыялады.
Анын айтымында, желим баштыктар, азык-түлүк калдыктары жана башка түрдүү таштандылар Тамчы айылына жакын жерде, Ысык-Көлдүн негизги жолунун 500 метр ары жагында жайылып жатат. Ал жердин айланасы тосулган эмес, эл өз алдынча таштанды таштоочу жайга айландырып алышкан.
"Шамал таштандыларды бир нече чакырым алыстыкка учуруп жатат. Кереметтүү тоолор жана касиеттүү көлүбүз желим баштык менен курулуш жана азык түлүк калдыктарына курчалып калды", — деди Сактанов.
Сактанов таштанды ыргытылган жайды жакында эле кичи мекенине келгенде көргөн. Мындан улам ал буга ким жооптуу жана көлдүн экологиялык абалын жакшыртуу үчүн жергиликтүү боюджеттен бөлүнгөн каражаттар каякка кетип жатат деп суроо салган.
Ал эми Ысык-Көл районунун акими Данир Иманалиев ал жер таштанды таштоочу жайга ылайыкталып, буга Санэпидемстанциянын уруксаты менен жер бөлүнгөнүн жана таштанды таштоого атайын аң казылганын билдирди.
"Жеке өзүм барып аралыктарын көрүп чыктым. Таштанды ташталган жай Тамчыдан 3 чакырым, көлдөн 4 чакырым алыстыкта жайгашкан. Таштанды таштоочу жай болуп тоо аймагында 10 жыл мурда негизделген. Тамчыга жайында 40 миңге жакын адам келет да таштандыларын калтырып кетет", — деди Иманалиев.
"Автор таштанды көп чачылган жерлерди гана тартып алып жарыялап жиберген. Кээде болуп турат, айрымдары таштандыны аңга ыргытпай, көрүнгөн жерге таштап кетишет", — деди аким.
Соңунда ал эртеңден тарта бүт чар-жайыт ыргытылган таштандылар тазаланарын убадалап, ага Ысык-Көлдүн реабилитациялык жолунда иштеп жаткан кытай компаниясынын атайын техникасы жардамга келерин айтты.
