БИШКЕК, 30-июн. — Sputnik. Жанар тоонун качан атыларын жана масштабы канчалык болоорун анын тегерегиндеги жер кыртышынын бийиктешинен улам билсе болот. Бул тууралуу окумуштуулар берген маалыматты жарыялаган Science Advances журналына шилтеме берип РИА Новости жазды.
"Гавайи аралындагы Килауэа вулканын байкоо маалында вулкан атылаар алдында сейсмикалык толкундардын ылдамдыгы анын ичиндеги басымды кантип көбөйтөөрүн билүүгө аракет кылдык. Ушунун аркасы менен жанар тоонун атылуу убактысын аныктоого болот", — деди Кембридж университетинин кызматкери Клэр Дональдсон.
Анын айтымында, ар бир жанар тоонун алдында өзүнө суюк магманы толтура турган резервуар жайгашкан. Вулкан атылаарда анын ичиндеги басым көбөйөт дагы, резервуар магмага толуп, жер кыртышынын көөп чыгышына алып келет.
Демек, окумуштуулар жанар тоонун айланасы канчалык "шишигенин" карап туруп эле, канча магма чыгарын жана атылаар мөөнөтүн аныктай алышат.
