БИШКЕК, 14-июн. — Sputnik. Дарыгерлердин текшерүүсүнөн өткөн токтогулдуктардын жарымынан көбүнүн ден соолугунда кемтик бар экени аныкталды. Бул тууралуу Улуттук госпиталдын дарыгерлеринин экспедициясы учурунда аныкталганын Саламаттык сактоо министрлиги билдирди.
Жаш дарыгерлер ассоциациясы тарабынан уюштурулган экспедиция 5-июндан 10-июнга чейин созулган.
Аталган уюмдун жетекчиси Элзар Тотоназаровдун айтымында, 2262 адам текшерүүдөн өтүп, алардын 1358нин саламаттыгы начар экендиги билинген.
"Илдети аныкталгандарга керектүү жардамдар көрсөтүлүп, тиешелүү ооруканаларга багыт берилди. Айрымдарына операция жасоо керек экендиги аныкталган", — деп жазылат маалыматта.
Алты айыл тургундарын текшерген экспедиция курамында уролог, гинеколог, лор, терапевт, хирург, невропатолог адистери бар.
