АСТАНА, 9-июн. – Sputnik. Алия Самидин. Астана шаарында үч ай бою энергетика боюнча өтө турган EXPO Astana-2017 эл аралык көргөзмөдө Кыргызстандын суу, күн, шамал энергиясынын мүмкүнчүлүгү жана маданияты таанытылат. Бул тууралуу Өнөр жай, энергетика жана жер казынасын пайдалануу мамлекеттик комитетинин төрагасынын орун басары Азамат Оморов билдирди.
Анын айтымында, павильонду жасалгалоо иштери аяктап, ал жерде өлкөнүн энергетикалык кубатын кенен түшүндүргөн атайын экрандар жайгаштырылды.
"Биз Кыргызстандын суу, күн, шамал энергиясынын мүмкүнчүлүгүн келгендерге ар тараптан көрсөтүп беребиз. Павильонубуздан коноктор Кыргызстандын тарыхы, үрп-адат, каада-салттары менен да тааныша алат", — деди ал.
"2010-жылдан бери Кыргызстандын энергетика тармагына 1,5 миллиард доллар инвестиция тартылган. Учурда "Камбар-Ата-1" долбооруна айрым ишканалар кызыгып жатат. Инвестор тартууга аракет кылуудабыз", — деди аткаминер.
10-июндан баштап 10-сентябрга чейин өтө турган көргөзмөгө 115 өлкө жана эл аралык 22 уюм катышат. Уюштуруучулар аталган иш-чарага 5 миллионго чукул көрүүчүнүн келиши күтүлүп жаткандыгын билдиришти.
