БИШКЕК, 7-июн. — Sputnik. Россия өлкө аймагындагы айдоочулук күбөлүк боюнча өзүнчө келишим түзүүнү сунуштап жатканын КР Тышкы иштер министрлигинин маалымат кызматы билдирди.
Эске салсак, 1-июндан тарта чет элдик айдоочулук күбөлүк менен Россиянын аймагында автоунаа айдоого тыюу салынган. Ушундан улам КР Тышкы иштер министрлигинин өкүлдөрү россиялык кесиптештери менен кеңешме өткөргөн.
Россия тарап бул маселени ЕАЭБдин алкагында өзүнчө келишим түзүү аркылуу кароо керектигин белгилешкен.
Ошол эле учурда Россия тарап мыйзамды сыйлаган чет элдик айдоочулардын айдоочулук күбөлүгүн алмаштырып алууга 2013-жылдан 2015-жылга чейин жана 2015-жылдан 2017-жылга чейин убакыт берилгенин билдиришти.
Чет элдик айдоочулук күбөлүк менен Россияда автоунаа айдоого чектөө киргизүү/тыюу салуу боюнча мыйзам долбоору 2013-жылы кабыл алынган.
