БИШКЕК, 6-июн. — Sputnik. Аксы районунда 4-июнда нөшөрлөгөн жамгырдан улам Падыша-Ата, Итагар, Авлетим дарыяларынын деңгээли көтөрүлүп райондогу Авлетим, Кашка-Суу, Кызыл-Туу айыл аймактарында кооптуу абал жаралды. Бул абалдан улам районго өзгөчө кырдаал абалы киргизилди. Бул тууралуу Өзгөчө кырдаалдар министрлигинин маалымат кызматы билдирди.
Өзгөчө кырдаалдарды жоюу максатында Жарандык коргонуу кызматтарынан штаб түзүлгөн.
"Өзгөчө кырдаалдар министри Кубатбек Бороновдун буйругунун негизинде, Аксы районуна ӨКМдин облустук башкармалыгынын башчысынын Абдишарип Бекилов кырдаалды жөнгө салуу аракетин көрүү үчүн аймакта жүрөт. Аталган кырдаал министрдин жеке көзөмөлүндө жана абалды жөнгө салуу үчүн министрликтен инженердик техника тартылууда", — деп айтылат маалыматта.
Тескей участкасындагы 2015-жылы ашар жолу менен курулган ички чарбалык көпүрөнүн сол жагындагы таянычтүркүгү чөгүп, жээктин 12 метрин суу жеп кеткен. Учурда жол жабык, ал эми жергиликтүү тургундар үчүн жөө жол бар.
ӨКМдин Жарандык коргонуу комиссиясы жеринде түшүндүрүү жана тактоо иштерин жүргүзүп жатат.
Аталган министрлик калыбына келтирүү иштери дарыядагы суунун деңгээли азайгандан кийин башталарын билдирди.
