Аптаптан аман калган жылан. Сауд Аравияда ысыктан акактаган жыланга адамдар суу беришип, жаныбардын сообуна калган. Маалыматтар боюнча адам менен жылан кездешкен чөлдө абанын температурасы 40-50 градуска жетип жатыптыр.
Амалкөй адам. Калаа тургуну Бакытбек Абдуллаев жолдо кетип баратып чоң таштардын айынан машинасынын дөңгөлөгүн жарып алган. Ал жолдо оңдоо иштери жүрүп жатканын эскерткен эч кандай белги коюлбаганын айтып, мэриядан келтирилген 2300 сом чыгымды өндүрүп алды.
Апасына ыраазы болгон Алия. Өлкө башчынын кызы Алия Шагиева өзүнүн Facebook социалдык тармактагы баракчасына апасынын тарбиясына ыраазы болуп, акча үнөмдөөнү апасынан үйрөнгөнүн жазып чыкты.
Ажонун кезектеги ыры. Кызы сүрөтчү, өзү ырчы айтор өлкө башчы үй-бүлөсү менен чыгармачыл инсандар экен. Жакында эле энелер күнүнө карата Атамбаевдин "Энекем" деген ыры жарык көрдү эле, күн өтпөй интернетке ажобуздун "Я вас люблю" деген ыры клиби менен жарыяланды.
Апта ирмеми. Бул жолку апта ирмеминде Канн кинофестивалындагы Моника Беллучинин өбүшүүсүнөн, Шри-Ланканын шаарында курулуп жаткан имараттын урап калганына чейин чагылдырылган.
Азия чемпионатынын алдыңкылары. Акыркы айларда спорт жаатында Кыргызстандын капчыгында медалдардын саны көбөйүп, спортчулар жүрөк жылытып жатат. Айтып оозду жыйгычакты ММА боюнча Азия чемпионатында жалпы командалык эсепте кыргыз мушкерлери биринчи орунду багындырышты.
Айттырбай келген жаратылыш кырсыгы. Кечээ, Оштун Тажикстан менен чектешкен аймагында күчү алты баллга жеткен жер силкинүү катталып, бактыга жараша кырсыктан улам жабыркагандар жана кыйроолор болгон жок.
Аба ырайы. Бүгүн өлкө аймагында мезгил-мезгили менен жаан жаайт.
Валюта наркы. Сомдун баасы долларга карата орто эсеп менен 67.73 (сатып алуу) жана 68.01 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.50 сом, Аи-95 үлгүсүндөгү бензин 40.90 сом, ал эми дизель майы 36.00 сомдон сатылууда.
Соңку сөз ордунда. Өнөрүң болсо өргө чап дегендей талантыңар болсо тартынбагыла!
Баарыңыздарга жакшы маанай каалап, Таалайгүл Усенбаева.
