БИШКЕК, 13-май — Sputnik. Токтогул аймагында премьер-министр Сооронбай Жээнбеков Токтогул ГЭСин модернизациялоо боюнча иштерге старт берди. Бул туурасында өкмөттүн маалымат кызматы кабарлады.
Ал энергетиктерди, жалпы кыргызстандыктарды өлкө турмушундагы бул маанилүү окуя — Токтогул ГЭСин модернизациялоо ишинин башталышы менен куттуктады.
Премьер-министр Токтогул ГЭСи ата мекендик энергетиканын флагманы болуп саналарын жана Кыргызстан үчүн стратегиялык өзгөчө мааниге ээ экендигин айтты.
"Токтогул ГЭСин модернизациялоо өлкөнүн энергетикалык туруктуулугун бекемдеп, энергетикалык көз карандысыздыкка алып келет. Бул тармак өлкөнү жана экономиканы өнүктрүүдө негизги ролду ойнойт. Мамлекеттин жашоо жөндөмдүүлүгү жана күнүмдүк ишмердүүлүгү энергетикага түздөн-түз көз каранды", — деди ал.
Аталган ГЭСти толук модернизациялоо долбоору үч этаптан турат. Анын жыйынтыгында Токтогул ГЭСинин кубаттуулугу 240 мВт көбөйөрү күтүлүүдө, пайдалануу мөөнөтү 35-40 жылга узарат.
Улуттук энергохолдинг буга чейин Токтогул ГЭСинин үч фазасы үчүн баш-аягы 487 миллион доллар жумшаларын билдирген.
Жээнбеков кабелдик туннелди, машина залын көрүп, Токтогул ГЭСин борбордук диспетчердик башкаруу пультунун иши менен таанышты.
Эске сала кетсек, Токтогул ГЭСи 1975-жылы ишке киргизилген жана өлкөдөгү эң ири электр станциясы болуп саналат.
