БИШКЕК, 13-май — Sputnik. Токтоболот Абдымомунов атындагы кыргыз улуттук драма театры Түркияда өтө турган "Түрк дүйнөсү" эл аралык фестивалына драматург Кайрат Иманалиевдин "Коркут ата" спектакли менен катышат. Бул тууралуу аталган театрдын адабий бөлүмүнүн башчысы Нуркыз Рыскул кызы билдирди.
Анын айтымында, маданий иш-чара 14-майда башталып 22-майга чейин Мерси жана Адана шаарларында өтөт. Спектаклди режиссер Марат Козукеев койгон.
"Коркут Ата" — оомал-төкмөл дүйнөдө кандай даражадагы адам болбосун, акыры өлүм анын эшигин черте турган күн келерин эскертүүчү философиялык чыгарма. Коркут жалпы түрк дүйнөсүнө таанымал, IX кылымда жашап өткөн даңазалуу кыл кыякчы, дастанчы, күүчү болгон. Коркут табияттын мыйзамына каршы туруп, эртеби-кечпи келе турган өлүмдөн качууга аракет кылат. Спектаклде ал өзү издеген өлбөстүктү күүгө салып, чыгармаларында түбөлүккө калтырып, өлүмдү акыры жеңгендиги тууралуу баяндалат.
