БИШКЕК, 25-апр. — Sputnik. Токтоболот Абдымомунов атындагы кыргыз улуттук академиялык драма театрынын жамааты Казакстандын Чымкент жана Түркстан шаарларында өткөн эл аралык "Театр жазы-2017" фестивалынан 2-орунду багындырды. Бул тууралуу Sputnik Кыргызстан агенттигине аталган театрдын адабий бөлүмүнүн башчысы Нуркыз Рыскул кызы билдирди.
Анын айтымында, фестиваль белгилүү режиссер, драматург, профессионал казак театр искусствосунун негиздөөчүлөрүнүн бири Жумат Шаниндин 125 жылдыгына арналган. Кыргыз артисттери сынакка драматург Кайрат Иманалиевдин калемине таандык "Коркут ата" спектакли менен барган.
"17-22-апрель күндөрү өткөн фестивалга түрк тилдүү мамлекеттер чакырылыптыр. "Коркут ата" спектаклин режиссер Марат Козукеев койду", — деди Нуркыз Рыскул кызы.
"Коркут Ата" — оомал-төкмөл дүйнөдө кандай даражадагы адам болбосун, акыры өлүм анын эшигин черте турган күн келерин эскертүүчү философиялык чыгарма. Коркут жалпы түрк дүйнөсүнө таанымал, IX кылымда жашап өткөн даңазалуу кыл кыякчы, дастанчы, күүчү болгон. Ал жөнөкөй бала эмес, керемет касиети бар, дүйнөгө кут алып келе турган уул катары сүрөттөлөт. Коркут табияттын мыйзамына каршы туруп, эртеби-кечпи келе турган өлүмдөн качууга аракет кылат. Спектаклде ал өзү издеген өлбөстүктү күүгө салып, чыгармаларында түбөлүккө калтырып, өлүмдү акыры жеңгендиги тууралуу баяндалат.
