БАТКЕН, 29-апр. — Sputnik. Баткен облусунда дыйкандарга зарыл болгон суу тосмо курулуп колдонууга берилди. Бул тууралуу БУУнун азык-түлүк жана айыл чарба уюмунун Баткен облусундагы Тынчтык орнотуу долбоорунун жетекчиси Матраим Жусупов билдирди.
Маалыматка ылайык, буга чейин Баткен районунун Самаркандек, Ак-Татыр, Ак-Сай айылдарында айдоо жерлерине суу жетпей келген. Себеби арыктар тийиштүү деңгээлде каралбай калган. Азыр БУУнун (Бириккен Улуттар Уюмунун) Кыргызстандагы өкүлчүлүгү жана жергиликтүү тургундар биргеликте арык тосмолорун жана суу өткөзгүчтөрдү эки жумада куруп колдонууга беришти.
"Буга чейин суу жетпей көпчүлүк жерлер иштетилбей келген. Азыр талааларга кеткен арыктарды цементтеп жасадык. Ага жергиликтүү тургундар катышты. Андан сырткары жергиликтүү дыйкандар менен сугатчылар сууну сарамжалдуу пайдалануу боюнча окуудан өтүүдө", — деди Жусупов.
Аталган иштерге жалпы 10 миң АКШ доллары сарпталып, 150 гектар жерге суу чыкты.
