БИШКЕК, 18-апр. — Sputnik. Баары Бакайдын кыш айларынын биринде кыргыздын классик акыны Алыкул Осмоновдун Бишкек шаарындагы үй-музейине барган учурдан башталган. Дүйнөнүн баары көзүнө идеалдуу көрүнүп турган бул куракта алп акындын жашап жана акыркы жайга узаган үйүнүн мындай абалда болушу 1-курстун студенти үчүн күтүүсүз болуптур.
"Кышында университеттин жетекчилиги менен келгенбиз. Тамдын чатырынан суу агып, начар абалда экен. Кагаздардын сыясы чыгып жатканын көрдүм. Кыргыздын улуу акынынын үй-музейи мынчалык байкуш абалда экендигин билген эмесмин. Көңүлүм ооруду", — деп айтып берди эл аралык "Ататүрк — Ала-Тоо" университетинин I курсунун студенти Бакай Матмусаев.
Учурда негизинен студент балдардан түзүлгөн "Алыкул ашары" демилгеси үй-музейди оңдоп чыгууну колго алып, ал үчүн атайын концерт уюштурууну пландап, демөөрчүлөрдү издөөнү баштады. Бакай бул боюнча ЭЛСОМдо: 0771939692 деген атайын эсептик комер ачылгандыгын айтты.
"Бул иш сен туула электе башталган"
Анткени менен Бакай бул иш оңойго турбастыгын сезиптир. Биринчи аракетте эле жыйынтык боло койбостугун, ага карабай аракетинен тайбай турганын айтты.
"Көпкө ойлондум. Алыкул Осмонов менен сыймыктанабыз дейбиз. Бирок ушундай кайдыгерлик абалга түшүп калганыбызга капаландым. Акындын атындагы сыйлыктын лауреаттары, анан биздин министрликтер бар. Демилгени баштаганда мага "бул иштер сен туула электе эле башталган" дешти… Антсе да жаштар бул демилгени колдоп кеткенине кубанып турам. Биз топ менен иштедик, командага ыраазылык билдирем", — деди Матмусаев.
Учурда биринчи иретте үй-музейдин чатырын, полун алмаштыруу иши турат. Балдар андан сырткары бул жайдын айланасын көрктөндүрөбүз, бул жер элди, кийинки муундарды өзүнө чакырып тургандай болушу керек деген дем менен жүрүшөт.
Айласыздан аз жашап, Алыкул акыркы сапарга узаган үй
"Алыкул үй борбору" коомдук бирикмесинин жетекчиси Памирбек Казыбаевдин айтымында, үй-музей 17 жыл мурда ачылган. Ошол мезгилден тарта бир дагы ремонт болбогондуктан, жалпы абалы начарлап, чатырынан суу өтүп жаткандыктан анын ичиндеги экспонаттардын сакталышына терс таасирин тийгизүүдө.
Музейден алынган маалыматтарга таянсак, алп акын Осмонов 1945-1950-жылы жашап, оорудан оңоло албай, ушул жерден көз жумган.
"Акын бул үйдү өзүнүн маңдай тери менен тапкан акчасына 1945-жылы сатып алып, 1950-жылга чейин жашаган. Оорусуна байланыштуу көпкө жашай албай, 12-декабрда 35 жашында ушул жерден көз жумган. Андыктан бул жерди кийинки муундар көздүн карегиндей сакташыбыз керек", — деди Казыбаев.
"Дубалдарынен беттери упаранып, чатырынан суу агып келет. Черепицалар калың карды көтөрө албай калды. Улам оңдоп коёбуз, улам түшөт. Бул меселе 2013-жылдан бери эле келе жатат. Полу да чирий баштады", — деди Казыбаев.
Биз узай бергенде Казыбаев ал жердеги экспонаттарды кармалап, кагаздарын чиймелеп, музейде калды. Кыязы, дагы кимге кайрылуу катын жолдоону ойлонуп жатты окшойт…
