БИШКЕК, 13-апр. — Sputnik. Түркиянын Хусейин А. аттуу жаранын сот 11 жылдан кийин актап, түрмөдө өткөргөн күндөрү үчүн жөлөк пул катары тогуз түрк лирасын (үч долларга жетпейт) алды. Бул тууралуу HaberTürk басылмасы жазып чыкты.
Маалыматка ылайык, киши 1980-жылы Dev-Sol радикалдык тобунун мүчөсү деп кармалып абакка кесилген. 11 жыл эки ай өткөндөн кийин ал 13 пункт боюнча акталган.
Боштондукка чыккан Хусейин 1,2 миллион түрк лирасын (330 миң доллар) төлөтүп алуу үчүн сотко кайрылган. Сот Хусейин камакка алынган жылдары эмгек акынын минималдык көлөмүн карап ага 8,78 миллион лира төлөп берүү өкүмүн чыгарган. Бирок 2005-жылы Түркиянын улуттук валютасы деноминация болгондуктан (купюрадан алты нөл алынган) төлөнө турчу сумма 8,80 лирага түшүп калган.
