"Аламүдүн" базарынын аймагындагы суу толгон чуңкур тургундардын жанын кашайтты

Бейшемби күнү, 13-апрелде Sputnik Кыргызстан агенттигинин WhatsApp-каналына эмчектеги баласы менен суу толгон чуңкурга кулаган аял тууралуу күбө маалымдады.

Өтүп бараткан эл ага жардам көрсөткөн. Күбөнүн айтымында, аял кулаганда ымыркайдын башы жерге тийген. Бирок жабырлануучу Тез жардам кызматын чакыртуудан баш тартып, шашкан бойдон кетип калган. Окуя Жибек Жолу проспектиси менен Курманжан датка көчөсүнүн (мурдагы Алмата көчөсү) кесилишинде болгон.

Аталган дарекке барган Sputnik Кыргызстан агенттигинин кабарчысы чуңкурга башка аял кулаганына күбө болду.

Жаран камерага өзүнүн нааразылык пикирин билдирди. 15 мүнөт өткөндөн кийин ошол эле чуңкурга өспүрүм бала кулап, белине чейин суу болду.

Суу жөө адамдар өтө турган жол сызыктан баштап тротуарга чейин каптап кеткен. Ал ортодо кайдыгер мамиле жасабагандар чыгып, чуңкурдун айланасын колго тийген брусчатка менен тороп коюшту.

"Ушунун баарын кылган муниципалдык кызматкерлер. Арыкты казган бойдон таштап коюшкан. Эми жаанда эл жүдөп жатат", — деп кабарчыга таксист билдирди.

Ал ошондой эле чуңкурга анын көзүнчө беш адам кулаганын кошумчалады.