БИШКЕК, 11-апр. — Sputnik. Баткен облусундагы чек арага жакын айылдарда сугат каналдарды эл ашар жолу менен ондоп алып жатат. Бул туурасында аймактык кабарчы билдирди.
Суу пайдаланучулар ассоциациясынын башчысы Амирбек Каразаковдун айтымында, Баткен районунун Самаркандек, Актатыр жана Ак-Сай айыл өкмөттөрүндөгү эгин талааларга Ак-Суу дарыясынан чыккан суу Тажикстан аймагы аркылуу салынган узундугу 19 чакырымдык канал аркылуу барат.
"Канал өткөн кылымдын 50-жылдары кол менен жөнөкөй жерге арык болуп түшкөн. Мындан улам суу жерге сиңип кетип, азайып отуруп алыскы айылдарга жетпей калган учурлар да болгон. Эми каналга цемент төшөлүп, суу эгин аянттарга жоготуусуз бара тургандай болуп оңдолууда", — деди Каразаков.
Мындан сырткары учурда Баткен району боюнча 300 чакырымдан ашуун ички каналдарды оңдоо иштери аяктап сугат мезгилине даярдыктар көрүлүүдө.
Жергиликтүү Самаркандек айылынын тургуну Эргеш Насиров жаздын кеч келип жатканы өзүнүн терс таасирин тийгизип, жазгы талаа жумуштарын кечеңдетип жатканын айтты.
