БИШКЕК, 4-апр.— Sputnik. Санкт-Петербургдагы жардыруудан кийин Кыргызстанда коопсуздук чаралар канчалык деңгээлде көрүлүп жаткандыгын Sputnik Кыргызстан агенттиги билип көрдү.
Террорчулукка каршы күрөшүү Улуттук комитетинин маалыматына ылайык, акыркы маалыматтар боюнча 14 адам каза болуп, элүүгө жакын адам түрдүү жаракаттарды алган. Жардырууну жасаган деп шектелгендердин катарында Кыргызстандын жараны дагы бар.
Эл аралык "Манас" аэропортунун жана "Кыргыз темир жолу" ишканасынын өкүлдөрү Россиядагы жардырууга чейин эле коопсуздук чаралары күн мурунтан көрүлгөнүн белгилешти.
"Коопсуздук бизде ар дайым биринчи орунда турат. УКМК менен биргеликте тийиштүү иштер жүргүзүлүүдө. Аскерлештирилген күзөт кызматкерлери компаниянын стратегиялык объектилерине такай көз салып турушат. Буга чейин бизге УКМК башчысы күмөн туудурган адамдарды жана жүктөрдү токтотуп, аларды тыкыр текшерүү керектигин эскертишкен", — деди "Кыргыз Темир Жолу" ишканасынын өкүлү.
КР Ички иштер министрлигинин маалымат кызматынан билдиришкендей, милиция кадимкидей иштеп жатат, ошол эле учурда сактык күчөтүлдү.
Ал эми Мамлекеттик чек ара кызматынан комментарий алууга мүмкүн болгон жок.
