БИШКЕК, 3-апр. — Sputnik. Японияга иш сапар менен барган ТИМ башчысы Эрлан Абдылдаев курулуш, жолду пландоо, салууда адистешкен "Shimizu Corporation", "Tokyo Rope MFG Co., Ltd" жана "Nippon Signal Co. Ltd" компанияларынын жетекчилери менен сүйлөшүүлөрдү жүргүздү. Бул туурасында ТИМдин маалымат кызматы кабарлады.
Аталган тармактарда 200 жылдан ашуун тажрыйбасы бар бул компаниялардын жер титирөөдөн кооптуулугун эске алып курган технологиялары КР делегациясын бир топ кызыктырган.
"Жаратылыш кырсыктарына каршы иш алып баруу боюнча япониялык алдыңкы технологиялар бизге да абдан керектүү. Жер титирөө, сел, жер көчкү улам кайталанчу биздин аймак үчүн абдан пайдалуу болчудай", — деген ТИМ башчысы Абдылдаев.
Ал аталган компанияларды долбоорлорун Кыргызстанда иштетип, аталган жааттагы тажрыйбасы менен бөлүшүүгө чакырды.
Апрель айында Бишкек шаарындагы жолдорду тарамдаштырууну талкуулоо максатында өтө турган семинарга "Shimizu Corporation" компаниясынын өкүлдөрү да келип катыша турган болду.
