БИШКЕК, 10-мар. — Sputnik. Американын Global Finance каржы басылмасы Кыргызстанды 148-орунга коюп жакыр өлкөлөрдүн катарына киргизген рейтинги туура эле. Бирок алар ички дүң продукциянын жан башына болгон көлөмүн гана эсептеп коюптур. Бул тарабынан алганда маалымат так эмес болуп калган. Бул тууралуу Sputnik Кыргызстан агенттигине Экономика министрлигинин алдындагы Макроэкономикалык саясат башкармалыгынын жетекчиси Насирдин Шамшиев билдирди.
Эске салсак, аталган каржы басылмасы түзгөн рейтингде Кыргызстан алты орунга артка жылып 148-орунду ээлөө менен 50 жакыр өлкөнүн катарын толуктаган.
"2015-жылы өлкөдөгү жакырчылыктын деңгээли 1,5 пайызга өсүп кетти. Бул сомдун долларга карата наркы менен түшүндүрүлөт. Себеби 2015-жылы баалар заматта өскөн", — деди Шамшиев.
Ал ошондой эле ИДПнын былтыркы көлөмү дагы кыйла төмөндөгөнүн билдирди.
Экономисттин айтымында, бир адамдын бир жылдык кирешеси 31573 сом болсо — жакыр, ал эми жылдык кирешеси 18234 сомду түзсө өтө жакыр болуп эсептелет.
"Аталган каржы басылмасы рейтингди Эл аралык Валюта фонду менен ИДПнын көлөмүнө таянуу менен гана чыгарып коюптур. Алар башка багыттарды эске алса жыйынтык бөлөк болмок", — деди Шамшиев.
Ал белгилегендей калктын 2014-жылдагы кирешеси 278 миллиард сомду түзсө, 2015-жылы 291 миллиард сомго жеткен.
Ал белгилегендей кафе-ресторандарда өткөн тойлорго эле миллиарддаган каражаттар жумшалат.
"Атайын адистер Кыргызстандагы 500 кафеге бир жылда кеткен чыгымды эсептешиптир. Алардын айтымында чыгымдын көлөмү жети миллиард сомду түзгөн. Ал эми өлкө аймагында кафелердин саны 500дөн дагы көп. Кээ бир адистер 1-2 миллиард доллар тойлорго жөн эле кетип жатканын билдиршти", — деди адис.
Ушунун бардыгын эске алганда рейтингдин жыйынтыгы башкача чыгып калышы мүмкүн экенин экономист кошумчалап өттү.
