БИШКЕК, 7-мар. — Sputnik. Американын Global Finance каржы басылмасы дүйнө жүзүнүн эң бай жана эң кедей өлкөлөрүн аныктап рейтинг түздү. Анда Кыргызстан 148-орунга илинген.
Былтыркы көрсөткүчкө салыштырмалуу өлкө 142-орундан 148-орунга түшүп алты позицияга артка жылган. Кыргызстан тизме боюнча Папуа Жаңы Гвинеясы менен Жибути өлкөлөрүнүн ортосунда жайгашып калды.
Рейтингди жүргүзүүдө басылма Бүткүл дүйнөлүк банк менен Эл аралык валюта фондунун маалыматтарына жана жан башына өндүрүлгөн ички дүң продукциясына таянуу менен чыгарган.
Борбордук Азияда Кыргызстанга салыштырмалуу Казакстан, Түркмөнстан, Өзбекстан байыраак деп саналган. Муңайга бай Казакстан 54-орунга илинсе, жаратылыш газын экспорттогон Түркмөнстан 73, кебез өндүргөн Өзбекстан 127-орунду ээлеген. Кыргызстандан кийин Тажикстан 153-орунда турат.
Ал эми эң бай 10 өлкөнүн катарына Катар, Люксембург, Макао, Сингапур, Бруней, Кувейт, Ирландия, Норвегия, Бириккен Араб Эмираттары жана Сан-Марино кирген.
Эң кедей өлкөлөрдүн катарына Борбор Африкалык Республикасы, Конго демократиялык республикасы, Бурунди, Либерия, Нигер, Малави, Мозамбик, Гвинея, Эритрея, Мадагаскар жана Коморы мамлекеттери илинген.
