Президенттик шайлоо жакындаган сайын ат салыша тургандар акырындык менен чыга баштады. Буга чейин Темир Сариев менен Бакыт Төрөбаев чамынса, кечээ күнү РАЖ Өмүрбек Бабановдун талапкерилигин колдой тургандыгын жар салды. Мурунку практиканы эске алганда бул катар калыңдай тургандыгы бышык. Анткен менен КСДПдан башкы оюнчунун чыкпай жаткандыгы көпчүлүктү ар кыл ойлорго салууда. Эмнеси болсо да быйыл шайлоонун арты менен жакшы эле шапар тепчүдөйбүз. Башкысы, баары аман-эсен өтүп кетсе болгону.
Оюндан от чыгып… Буга чейин көпчүлүк божомолго алгандай эле Башкы прокуратура Өмүрбек Текебаевди суракка чакырды. Президентке байма-бай сындарды айтып, күн узабай маалымат жыйындарды өткөргөн Текебаевдин деле таянган тоосу бардыр. Эки дөө урушканда кумурскалар тепселендиде калбаса болду.
Дагы бир депутатка коррупция менен кылмыш иши козголду. Бул ирет Жогорку Кеңештин КСДП фракциясынан депутаты Музаффар Исаковго карата Кылмыш жаза кодексинин коррупция беренеси боюнча кылмыш иши козголду.
Футбол мыктылары аныкталды. Алиа Силла жылдын мыкты бомбардири аталса, Максат Алимов мыкты чабуулчу деп табылды. Калган мыктылар тууралуу кененирээк төмөнкү макалада.
Баарыбызды эле бала кезде бешикке бөлөп баккан. Азыр эле бешикке салгандар азайып калды. Аттиң ошолор бешиктин пайдасын билсе. Эмесе, кесиптешим Таалайгүл Усенбаева бешиктин пайдасы менен зыянын билип көрдү.
Өткөн айда "Манас" аэропортуна жакын жердеги Дача айылына жүк ташуучу учак кулап, 39 адамдын өмүрүн алгандан кийин өлкөдөгү дачалар жана мыйзамсыз курулуштар маселеси кайрадан курчуган. Кесиптешибиз Бегимай Бакашева дачалар тууралуу билип көрдү.
Өлкөнүн көпчүлүк аймактарында кар жаашы күтүлөт.
Валюта наркы. Бүгүн сомдун баасы долларга карата орто эсеп менен 68.99 (сатып алуу) жана 69.30 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 38.20 сом, Аи-95 үлгүсүндөгү бензин 40.70 сом, ал эми дизель майы 35.70 сомдон сатылууда.
Соңку сөз ордуна. Аракетке берекет.
Амандыгыңызды тилеп Исмаил Мамытов.
