БИШКЕК, 7-фев. — Sputnik. Өлкө башчы Алмазбек Атамбаев транспорт жана жолдор министри Жамшитбек Калиловду кабыл алып, өлкө аймагында курулуп жаткан жолдордун абалы боюнча маалымат алганын президенттин маалымат кызматы билдирди.
Калилов өлкөнүн негизги кан тамыры болгон жолдор Балыкчы — Казарман — Жалал-Абад, Бишкек — Чолпон-Ата — Корумду, Бишкек — Нарын — Торугарт, Ош — Баткен — Исфана, Талас — Тараз — Суусамыр жолдорун куруу жана Бишкек — Кара-Балта жолунун курулушун баштоого жүрүп жаткан даярдыктар тууралуу маалымат берген.
Андан сырткары, жергиликтүү маанидеги жолдорду оңдоо, аймактардагы жолдорду салуу боюнча да билдирди.
Өз кезегинде Атамбаев Кыргызстанда ишке ашырылып жаткан бардык долбоорлорду убагында аткаруунун маанилүүлүгүн белгилеп, быйыл белгиленген бардык иштерди убагында аткарууну тапшырды. Андан сырткары жасалган иштердин сапаты тыкыр көзөмөлдө болушу керектигин эскертти.
