ӨКМ жолго чыккандарды көчкүдөн сак болууга чакырды

БИШКЕК, 27-янв. — Sputnik. Кыргызстандын тоолуу жолдорунда кар көчкү түшүү кооптуулугу жаралгандыктан, Өзгөчө кырдаалдар министрлиги жолго чыккан жарандарды сак болууга чакырды. Мааламатты аталган министрликтин маалымат кызматы таратты.

Анда республиканын тоолуу райондорунда, Бишкек-Ош унаа жолунун 121-138-чакырымдарында (Төө-Ашуу ашуусу), 198-265-чакырымында (Ала-Бел ашуусу, Чычкан капчыгайы), 351-365-чакырымдарында (Көк-Бел ашуусу) кооптуулук сакталаары кабарланды.

Андан сырткары, жолго чыккандар Мырзаке-Кара-Кулжа-Алайкуу унаа жолунун 65-90-чакырымдарында, Ала-Бука-Каныш-Кыя унаа жолунун 65-90-чакырымдарында, Красная-Горка-Ак-Таш унаа жолунун 1-9- чакырымдарында, Казарман-Актал-Чат унаа жолунун 67-94-чакырымдарында (Кара-Көө ашуусу) (Ийри–Суу участкасынын 42-44-чакырым) жана Каракол-Эңилчек унаа жолунун 45-92-чакырымдарында (Чоң-Ашуу ашуусу) сак болуусу керек.

Көчкү коркунучунан сырткары жолдор тайгак болуп муз тоңуп, күрткү жаралат.

ӨКМ унаалардын ортосундагы 500 метр аралык кыймылы чектелүүсү зарылдыгын кошо билдирди.

Кырсыктын алдын алуу максатында ӨКМ тарабынан кечээ, 26-январында уюлдук операторлор аркылуу элге СМС билдирүүлөр жөнөтүлгөн.