БИШКЕК, 24-янв. — Sputnik. Дача айылына кулаган учактан куюлган майдын жыты дагы деле кетпей, айыл эли жаш балдардын ден-соолугуна кооптонуп жатышат. Бул тууралуу аталган айылдын тургуну Туратбек Токторбаев Sputnik Кыргызстан маалымат агенттигине маалымдады.
Белгилей кетсек, буга чейин Саламаттык сактоо министрлиги тазаланбаган майдын жытынан ууланды делип беш бала оорукана жаткырылганын билдирген.
Айыл тургунунун айтымында, кулаган учактын майы айылдын башындагы эки көчөгө (9-10-линия) көп аккан.
"Андан бери бир жума өттү, жыты дагы деле кете элек. Ал тургай көлчүк болуп калган жерлери да бар. Мен кошуналарымдын балдары ууланып ооруканага жата баштаганынан улам кооптонуп, балдарымды башка жактагы туугандарымдыкына жиберип ийдим", — деди Токторбаев.
Буга чейин ӨКМ кулаган учактын майынын көбү күйүп кеткенин, калган 100 литрдей авиакеросин атайын эреже боюнча куюлуп алынганын билдирген.
ӨКМ министри Кубатбек Боронов авиакеросин атайын эреже менен куюлуп алганын тастыктап, ооруканага жаткырылган балдар күйүүчү майдан ууланганынан күмөн санады.
Саламаттык сактоо министрлиги Дача айылынын ичкен суусун текшерип, жыйынтыгында суу органолептикалык жана физикалык-химиялык көрсөткүчтөр боюнча регламенттердин талаптарына жооп берерин тастыктаган.
Эскерте кетсек, 16-январь күнү эртең менен Гонкогдон Стамбулду көздөй келе жаткан Boeing-747 учагы Дача айылына кулап, кырсыктан 39 кишинин өмүрү кыйылган.
