БИШКЕК, 24-янв. — Sputnik. "Манас" аэропортуна жакын жердеги Дача айылына кулаган учактын майынын көбү күйүп кеткенин ӨКМ билдирди. Калган 100 литрдей авиакеросин атайын эреже боюнча куюлуп алынган.
Белгилей кетсек, кыйраган учактын майы тазаланбай, анын кесепетинен беш бала ууланганын Саламаттык сактоо министрлиги билдирген. Балдар ооруканага жаткырылган.
"Учак кыйраган жерде анын майы калган эмес. Жарандык коргонуунун тийиштүү кызматтары топурактын, абанын жана суунун үлгүсүн алды. Алардын жыйынтыктары тууралуу кийин маалымдалат", — деп айтылат маалыматта.
2017-жылдын 16-январында эртең менен саат 7.31де Boeing 747 учагы "Манас" аэропортуна жакын жердеги Дача айылына кулаган. Кырсык 39 кишинин өмүрүн алып, 23 үйдү жараксыз абалга келтирген.
Учурда кырсык боюнча иликтөө иштерин КМШнын Мамлекеттер аралык авиация комитети жүргүзүп жатат.
