БИШКЕК, 19-янв. — Sputnik. Дача айылынын үстүнө кулаган Boeing-747 учагынын эки кара ящигиндеги жазууну чечмелөө үчүн Москвага жөнөтүлдү. Бул тууралуу өкмөттүн маалымат кызматынан кабарлашты.
Билдирмеге караганда, ящиктеги маалыматтарды Мамлекеттер аралык авиациялык комитеттин адистери иликтөөгө алышат. Анын негизинде кырсыктын себептери аныкталмакчы.
Мындан тышкары, учурда Мамлекеттер аралык авиациялык комитеттин алты адиси иштеп жатат. Алар үч топко бөлүнүп, биринчиси кырсык болгон жерде, экинчиси "Манас" эл аралык аэропортунун кызматкерлери, үчүнчүсү Транспорт жана жолдор министрлигинин алдындагы "Кыргызаэронавигациясы" менен биргеликте иш алып барууда.
Эске салсак, Гонконг — Стамбул каттамы менен учкан MyCargo Airlines авиакомпаниясына таандык Boeing-747-400F учагы "Манас" аэропортуна жакын жердеги Дача айылына кулап түшкөн. Анын кесепетинен 38 киши каза болуп, 23 үй бузулган.
