БИШКЕК, 8-янв. — Sputnik. Ишемби күнкү АКШнын Флорида штатындагы атышуудан каза болгон жана жабыркагандардын арасында кыргызстандык жарандар жок. Бул тууралуу Тышкы иштер министрлиги билдирди.
Кырсык Форт-Лодердейл аэропортунда эл жүгүн алып жаткан маалда болгон. Атышуудан беш киши каза болуп, 40 адам ар кандай жараат алган. Алдын ала маалыматтар боюнча окту латын америкалык Эстебан Сантьяго ачып, иликтей келгенде анын Ирак согушунун ардагери экени, психикасы жабыркап дарыланып жүргөнү аныкталган.
Билдирүүдө эгер Сантьягонун күнөөсү далилденсе, ал өлүм жазасына тартылары белгиленет.
Тергөөчүлөрдүн айтымында, Сантьяго аэропортко келип, адамдарды туш келди аткылай баштаган. Буга чейин анын аракеттери террорчулук менен байланыштырылып келген, бирок үйүн тинтүү учурунда анын компьютери менен телефонунан террордук уюмдар менен алакасы бар экенин ырастаган эч кандай далил табылган эмес.
