БИШКЕК, 21-дек. — Sputnik. Кыргызстандын пара-пауэрлифтинг боюнча курамасы рак оорусуна чалдыккан балдарга 200 миң сом бөлдү.
Спортчулар Эсен Калиев менен Жыргалбек Орозбаев Рио-де-Жанейродо (Бразилия) 7-18-сентябрь күндөрү өткөн Паралимпиада оюндарында бешинчи жана алтынчы орундарга ээ болушкан. Улуттук онкология борборунун балдар бөлүмүнө жетишкен ийгиликтери үчүн ыйгарылган байге акчанын эсебинен которулду.
Башкы машыктыруучу Аднан Жабраилов белгилегендей, спортчулар акчалуу байгеге ээ болгондон кийин кимге жардам берсек деп ойлонушкан.
"Биз онкология борборунун балдар бөлүмүндө каражат, жабдыктар, бейтаптар үчүн дары-дармектер жетишпей жатканын билдик. Ошондон улам аларга жардам берүүнү туура көрдүк", — деди Жабраилов.
Каражат тапшыруу аземи шаршемби күнү өттү. Спортчулар дарыгерлерге 200 миң сомдук сертификатты тапшырышты. Улуттук онкология борборунун балдар бөлүмүнүн жетекчиси Гүлнара Жунушалиева маалымдагандай, каражат химиотерапия жана сөөктүн чучугун алмаштырган жабдуу үчүн жумшалат.
"Биз ойлонуп көрүп, каражатты жабдуу алууга жумшоону чечтик. Азырынча дары-дармектер жетиштүү. Президент бир жылдын ичинде дары-дармек жагынан жардам берди. Бул каражаттын үстүнө дагы демөөрчүлөрдүн акчасын кошуп январда жабдуу сатып алабыз", — деди Жунушалиева.
Ал эми Жыргалбек Орозбаев 107 киллограмм салмакка чейинки категорияда Кыргызстандын намысын коргогон. Ал биринчи аракетинде 203 килограммды көтөрүп, алтынчы оруну үчүн 900 миң сом менен сыйланган.
Машыктыруучулары Аднан жана Аслан Джабраиловдор бул сумманын 25 пайызын алышкан.
