БИШКЕК, 10-дек. — Sputnik. Нигериянын Мадагали шаарында жайгашкан базарда эки жолу жардыруу катталып, каза болгондордун саны 56га жетти. Бул тууралуу Рейтер агенттигине шилтеме берип РИА Новости маалымдады.
Аймактык бийликтин жетекчиси Юсуф Мохаммеддин айтымында, кырсыктан 56 адам каза таап, 57 адам жарадар болгон.
Нигерия бийлиги шаарды былтыр "Боко Харам" радикалдык уюмунун согушкерлеринен бошоткон.
Учурда аскерлер террорчулар жашынып жүргөн Самбис токоюна ок атууда.
"Боко Харам" радикалдык тобу Нигериянын түндүк-чыгышында өз өкүмүн жүргүзүп келет. Террорчулар бир нече ири, кандуу терактыларды жасаган. Алар бул каршылыгын Нигерия, Чад жана Камерун өлкөлөрүндөгү аларга каршы жасалган аскердик кампанияга жооп иретинде жасадык деп билдирип келишет. Согушкерлер билим берүүнүн батыштык моделине каршы туруп, өлкө боюнча шарияттын бардык эрежелерин киргизүү керек деп эсептешет.
