БИШКЕК, 6-дек. — Sputnik. Бишкек шаарынын базарларында жаңы жылдык пиротехникалык каражаттарды сатууга тыюу салынган. Фейерверктер атайын дүкөндөргө гана сатылат. Бул тууралуу Sputnik Кыргызстан агенттигине Экологиялык жана техникалык коопсуздук боюнча мамлекеттик инспекциясынын өрткө каршы көзөмөл башкармалыгынын жетекчиси Болот Туячиев билдирди.
Анын айтымында, мындай кадамдар шаардыктардын коопсуздугун сактоо жана өрттүн алдын алуу максатында жасалды. Мындан тышкары, сертификацияланбаган пиротехникалык каражаттар ден соолукка залака тийгизиши ыктымал.
"Административдик кодекске ылайык өз аймагында пиротехникалык каражаттарды мыйзамсыз сатууга уруксат берген базарлардын администрациясы 50 миң сом айып пул төлөөгө мажбур болот. Эгер сатуучу өз алдынча чыгып алып көчөдө сатып жаткан жеринен кармалса, 500 сомдон 1 000 сомго чейин айып пул төлөйт", — деди Туячиев.
Маалыматта айтылгандай кыргыз өкмөтүнүн 2009-жылкы токтомуна ылайык пиротехникалык каражаттарды атайын дүкөндөрдө гана сатууга уруксат берилген. Укук коргоо органдары менен биргеликте муниципалдык кызматтардын күчү менен шаар аймагында фейерверктерди мыйзамсыз саткандарды кармоо рейддери жүргүзүлүп келет.
