БИШКЕК, 21-ноя. — Sputnik. Куюнда калып, илдетке чалдыккан жигиттин майыптыгы тиешелүү медициналык мекеме тарабынан далилденсе жөлөк пул чегерилет. Бул тууралуу Кара-Суу райондук социалдык өнүктүрүү башкармалыгынын башчысы Куттубек Абдуллаев аймактык кабарчыга билдирди.
Эске сала кетсек, Ош облусуна караштуу Кара-Суу районунун Маданият айылынын тургуну Абдибаит Тезекбаев 28 жаштагы уулу Миржигит Тезекбаевдин майыптыгы боюнча жөлөк пул чыгарууга тиешелуу кызматтардан жардам сурап, үнүн жеткирүү үчүн Sputnik Кыргызстан агенттигине кайрылган.
Кара-Суу райондук социалдык өнүктүрүү башкармалыгынын башчысы Куттубек Абдуллаев маалымат Sputnik Кыргызстан агенттигине чыгаары менен кызматкерлер Тезекбаевдерден кабар алганын билдирди.
"Тезекбаев уулунун мүмкүнчүлүгү чектелгендиги боюнча тиешелүү медициналык мекелерге кайрылып, аныктама алган эмес экен. Мындан сырткары, уулуна жөлөк пул алуу үчүн тиешелүү мамлекеттик органдарга да кайрылып, документ тапшырбаганы аныкталды", — деди Абдуллаев.
Ал адистер баланын тиешелүү документтерин, аталган айыл өкмөттө жашагандыгы боюнча аныктамаларын чогултканын кошумчалады.
"Кара-Cуу райондор аралык медициналык социалдык экспертизалык комиссиясына кат менен кайрылуу жасадык. Эгерде комиссия тарабынан чындыгында баланын ден соолугу боюнча мүмүкүнчүлүгү чектелгени аныкталса, майыптыгы боюнча канчанчы топко тиешелүү экендиги такталып, корутунду чыкса, социалдык өнүктүрүү башкармалыгы Миржигит Тезекбаевге жөлөк пул чыгарып берүүнү колго алабыз", — деди ал.
28 жаштагы Миржигиттин энеси Минавар Тезекбаева мындан төрт жыл мурун каза болуп калгандыктан, учурда ата-бала бир үйдө жалгыз жашайт.
