БИШКЕК, 12-окт. — Sputnik. Ош облусуна караштуу Кара-Суу районунун Маданият айылынын тургуну Абдибаит Тезекбаев 28 жаштагы уулуна майыптыгы боюнча жөлөк пул чыгарууга тиешелуу кызматтардан жардам сурайт. Бул тууралуу ал аймактык кабарчыга айтып берди.
Анын айтымында, уулу Миржигит 12 жашында мал айдап келе жатып, куюнга туш болуп калган. Катуу коркуп, андан кийин оорудан арыла албай койгон өспүрүмгө дарыгерлер "катуу корккон" деген диагноз коюшкан.
Тезекбаев уулу 7- класстан кийин ооруп калгандыгына байланыштуу мектепти да аяктабай калганын, ага майыптыгы боюнча жөлөк пул алуу үчүн текшерүүдөн өтүшү керектигин кошумчалады.
"Пенсионермин, эч жерде иштебейм. 2300 сом пенсия алам. Уулумдун майыптыгы үчүн жөлөк пул алууга тиешелуу документтерди тапшыруу керек. Ага да мүмкүнчүлүгүм жок. Уулумдун оорусуна кайгырып жүрүп кан басымым көтөрүлүп, нервим жабыркады. Аялым Минавар Тезекбаева мындан төрт жыл мурда 60 жашында рак илдетинен улам каза болуп калды. Бул уулумдун оорусун күчөтүп жиберди. Куз-жаз айларында оорусу күчөп, титиреп жатып калат. Дарылары да кымбат турат", — деди Тезекбаев.
Ал уулунун келечегине кейиди.
"Аттестаты да жок. Менин көзүм өтсө, келечеги эмне болот деп сарсанаа тартып келем. Жөлөк пул алууга тиешелуу кызматтар көмөктөшсө жакшы болмок", — деди ал.
Тезекбаев Миржигитти молдолорго да окутуп, дем салдырганын, бирок андан майнап чыкпаганын кошумчалады.
