БИШКЕК, 9-ноя. — Sputnik. Жогору Кеңештин депутаттары өкмөттүн жаңы курамы менен программасын бекитип берди.
Аталган курам буга чейин ЖКнын мамлекеттик түзүлүш боюнча комитетинин жыйынында, көпчүлүк коалициясында да каралган.
"Көпчүлүк коалициясы тарабынан мага ишеним көрсөтүлүп, өкмөттүн жаңы курамын алып келип отурам. Үстүбүздөгү жылдын 13-апрелинде менин программам көпчүлүк депутаттар тарабынан колдоо тапкан. Ошол программа жаңысын иштеп чыгууга негиз болду. Азыркы программада саясий партиялардын платформалары эске алынып, өлкөнү өнүктүрүүгө багытталат", — деди Жээнбеков.
Мындан сырткары, ал сегиз ай ичинде жасалган иш тууралуу отчет берип, көп иштер жасалгандыгын баса белгиледи.
Ал эми Сооронбай Жээнбековдун программасын 106 эл өкүлү колдоп, алты депутат каршы чыкты.
Курамын 112 депутат колдоп, төрт депутат каршы чыкты.
Ошентип Сооронбай Жээнбеков баштаган өкмөттүн жаңы курамында алты министр жана бир вице-премьер алмашты.
