БИШКЕК, 8-ноя. — Sputnik. Парламенттеги көпчүлүк коалициясы премьер-министрликке талапкер Сооронбай Жээнбеков тарабынан сунушталган өкмөттүн курамы менен программасын колдоп берди.
Аталган курам буга чейин ЖКнын мамлекеттик түзүлүш боюнча комитетинин жыйынында да сунушталган.
Коалиция үч саат бою өкмөттүн курамы менен программасын жана чечилиши талап кылынган маселелерди талкуулады.
"Бул өкмөттүн ишине коалиция да жоопкер болот. Бүгүн бир катар көйгөйлөр айтылды. АӨкмөт анын баарын эске алып, өз программасына кошот деген ишеничтемин. Жаңы курамда тажрыйбалуу адистер менен бирге жаштар да бар. Бул туура кадам, жаштар да иштеши керек", — деди көпчүлүк коалициясынын лидери Иса Өмүркулов.
Өз кезегинде Жээнбеков колдоо көрсөткөн депутаттарга ыраазычылык билдирди.
"Өкмөттүн курамы менен программасын колдоп бергениңиздерге рахмат. Ишеничиңерди актоого аракет кылабыз", — деди ал.
Коалиция өкмөттүн жаңы курамын шаршемби күнү өтө турган жыйында расмий бекитүүнү чечти. Отурумда өкмөт мүчөлүгүнө талапкерлер катышат.
