БИШКЕК, 31-окт.— Sputnik. КМШ өлкөлөрүндөгү жаш муундун өкүлдөрү Бакуда өтө турган эл аралык конференцияга катышат. Бул тууралуу Жаштар иши, дене тарбия жана спорт боюнча мамлекеттик агенттигинин маалымат кызматы билдирди.
Иш-чара "Жаштарды өнүктүрүүдө бейрасмий билим берүүнүн ролу" деп аталып, 23-24-ноябрда Азербайжандын Баку шаарында болмокчу.
Конференцияга билим берүү жана саясат багытында иш алып барган жаш муундун өкүлдөрү теориялык жана практикалык билимдерин көрсөтүү, жаштар менен иштешүүдө бейрасмий билим берүү ыкмаларын талкуулоо максатында чогулушат.
Эл аралык конференцияда өз өлкөсүн 18 жаштан 29 жашка чейин жаштар саясатындагы үч адис тааныштыра алат.
Жаштар иши, дене тарбия жана спорт боюнча мамлекеттик агенттигинин сайтында арыздарды тапшыруу боюнча шарттар жазылган.
