БИШКЕК, 28-окт. — Sputnik. Баткен облусунун Лейлек районуна караштуу Достук айылында "Лейлек жаштары экстремизм жана терроризмге каршы" аттуу темада семинар өттү. Бул тууралуу Баткен облусттук ИИБ маалымат катчысы Дамира Юсупова билдирди.
"Укук коргоо кызматкерлери диний экстремизмге, терроризмге каршы күрөшүү, туура эмес агымдарга кирип кетүүдөн оолак болуунун жол-жоболорун үйрөтүшүп, террористтик уюмдар тууралуу кеңири маалымат беришти", — деди Юсупова.
Маалымат катчысы кабарлагандай, семинарда айыл тургундары мындай кадамга диний азгырыкка алданып же акчанын жетишпестигинен барып жаткандыгын айтышкан.
Учурда "Хизб ут-Тахрир", "Вахабизм" сыяктуу туура эмес диний агымдарга кирип, каттоодо турган атуулдар менен милиция кызматкерлери иш алып барышууда.
Иш-чаранын соңунда мектеп окуучулары арасында спорттун волейбол түрү боюнча мелдеш өткөрүлүп, жеңүүчүлөргө Лейлек РИИБи тарабынан сыйлыктар тапшырылды.
