БИШКЕК, 4 окт. — Sputnik. Москвадагы "Кыргызстан" соода-көргөзмө борбору ВДНХнын аймагында жаңы форматта иштей баштайт. Бул тууралуу Экономика министрлигинин маалымат кызматы билдирди.
Буга чейин павильондун иш-аракети коммерциялык мүнөздө болуп келсе, азыр объект Россиядагы кыргыздардын кызыкчылыгы үчүн кызмат кылат.
"Азыр соода-көргөзмө борборунун ишмердүүлүгүнүн негизги багыты илимий-техникалык жана соода-экономикалык интеграцияны жайылтуу жана тереңдетүү, Кыргызстан менен Россиянын ортосундагы маданий байланыштарды өнүктүрүү болуп саналат", — деп айтылат билдирүүдө.
Аталган имарат мурдагы Кыргыз ССРи учурунда 1954-жылы курулган. Ал ВДНХда фонтандын сол жагындагы элдердин достук аянтында жайгашкан. Алгач бул жерде Балтика республикаларынын үч павильону жайгашкан, 60-жылдардын ортосунда Эстониянын павильонун Кыргызстанга өткөрүп беришкен. СССР кулагандан кийин имараттын аянтын ар түрдүү жеке компаниялар ижарага алышкан, бирок республиканын соода-экономикалык мүмкүнчүлүктөрүн маалымдоо жаатында колдонулган эмес.
