БИШКЕК, 1-окт. — Sputnik. Баткен облусундагы Кадамжай шаарында 14 бала өз ата-энесин тапты. Бул туурасында Эмгек жана социалдык жактан коргоо боюнча министрликтин маалымат кызматы кабарлады.
"Кут кадам" деп аталган үй-бүлөлүк типтеги балдар үйүндө ата-эне мээриминен ажыраган кичинекейлер үчүн бардык шарттары менен 22 орун камдалган.
Аталган жайдын директору Азима Караеванын айтымында, балдардын күнү-түнү калышы үчүн зарыл болгон бардык шарттар түзүлгөн.
"Азыр бизде күнү-түнү ушул жайда жашаган жети, ал эми күндүзү кала турган бир бала бар. Алар өздөрүн кадимки үйдөгүдөй сезип, ээн-эркин болсун деген максатта бардык шарттарды түзүүгө аракет кылдык. Бул жакка балдар мектеп сымал келип, окуп, тамак-аш жасаганды өздөштүрүп кетишет. Аракетибиз текке кетпей 14 бала өз ата-энесин тапты",— деди Караева.
Үй-бүлөлүк типтеги балдар үйү Эмгек жана социалдык жактан коргоо боюнча министрликтин мамлекеттик социалдык тапшырыгынын алкагында ачылган.
